ബാലസാഹിത്യപുരസ്കാരങ്ങള്‍

മലയാള ബാലസാഹിത്യത്തിനു മികച്ച സംഭാവനകള്‍ നല്‍കുന്ന ബാലസാഹിത്യകാര്‍ക്ക് അംഗീകരാവും പ്രോത്സാഹനവും നല്‍കുന്നത് മലയാളബാലസാഹിത്യശാഖയെ കൂടുതല്‍ ഉയരങ്ങളിലേക്കു കൂട്ടിക്കൊണ്ടുപോകും എന്നതില്‍ സംശയമില്ല. ഈ ലക്ഷ്യം മുന്‍നിര്‍ത്തി നിരവധി ബാലസാഹിത്യ പുരസ്കാരങ്ങള്‍ എല്ലാ വര്‍ഷവും ഇന്‍സ്റ്റിറ്റ്യൂട്ട് നല്‍കി വരുന്നു. 1990 ലാണ് ഇന്‍സ്റ്റിറ്റ്യൂട്ടിന്റെ പേരിലുള്ള ആദ്യ പുരസ്കാരം സമ്മാനിക്കുന്നത്. ‘ചിത്രശലഭങ്ങള്‍’ എന്ന പുസ്തകത്തിന് സുരേഷ് ഇളമണും ‘കണ്ണുണ്ടായാല്‍ പോര കാണണം’ എന്ന പുസ്തകത്തിന് ഹൈദ്രോസ് ആലുവയുമാണ് ഈ പുരസ്കാരങ്ങള്‍ ഏറ്റുവാങ്ങിയത്. തൊട്ടുമുന്‍പുള്ള മൂന്നു വര്‍ഷങ്ങളില്‍ പ്രസിദ്ധീകരിച്ച ഏറ്റവും മികച്ച മൗലികബാലസാഹിത്യപുസ്തകത്തിനായിരുന്നു പുരസ്കാരം. 1992 മുതല്‍ സര്‍ഗ്ഗാത്മകം, വൈജ്ഞാനികം എന്നീ രണ്ടു വിഭാഗങ്ങളിലായി പ്രത്യേകം പുരസ്കാരങ്ങള്‍ നല്‍കിത്തുടങ്ങി. തൊട്ടടുത്ത വര്‍ഷം പുനരാഖ്യാനം/വിവര്‍ത്തനം എന്ന വിഭാഗം കൂടി ഉള്‍പ്പെടുത്തിയതോടെ പുരസ്കാരങ്ങളുടെ എണ്ണം മൂന്നായി ഉയര്‍ന്നു. പ്രമുഖ ബാസാലസാഹിത്യകാരനായിരുന്ന മാലി മാധവന്‍ നായരുടെ സ്മരണാര്‍ത്ഥം ‘മാലി അവാര്‍ഡ്’ എന്ന പേരിലായിരുന്നു ഈ വിഭാഗത്തിനുള്ള പുരസ്കാരം. 1994 ല്‍ ബാലനാടകം എന്ന വിഭാഗത്തിലും പുരസ്കാരം നല്‍കിത്തുടങ്ങി. സ്ഥാപക ഡയറക്ടറായ ശ്രീ ഏബ്രഹാം ജോസഫിനോടുള്ള ആദരസൂചകമായി ‘എബ്രഹാം ജോസഫ് സ്മാരക ബാലനാടക പുരസ്കാരം’ എന്ന പേരിലായിരുന്നു ഈ അവാര്‍ഡ്. 1995 മുതല്‍ പുരസ്കാരവിഭാഗങ്ങള്‍ വീണ്ടും പരിഷ്കരിച്ചു. കഥ-നോവല്‍, നാടകം, പുനരാഖ്യാനം/വിവര്‍ത്തനം, വൈജ്ഞാനികം, ചിത്രീകരണം എന്നീ വിഭാഗങ്ങളിലായി പുരസ്കാരങ്ങള്‍ നല്‍കിത്തുടങ്ങി. മികച്ച ചിത്രീകരണത്തിനുള്ള പുരസ്കാരം കേരളത്തിലെ ചിത്രകാര്‍ക്കുള്ള അംഗീകാരം കൂടിയായിരുന്നു.
2009 വരെ ആറ് വിഭാഗങ്ങളിലായി നല്‍കിയിരുന്ന അവാര്‍ഡുകള്‍ 2010 മുതല്‍ പത്തു വിഭാഗങ്ങളിലേക്ക് വിപുലീകരിച്ചു. 1. കഥ/നോവല്‍ (എബ്രഹാം ജോസഫ് പുരസ്കാരം) 2. നാടകം 3. കവിത 4. ശാസ്ത്രം (പി ടി ഭാസ്കരപ്പണിക്കര്‍ പുരസ്കാരം) 5. വൈജ്ഞാനികം (ശാസ്ത്രമൊഴികെ) 6. ജീവചരിത്രം/ആത്മകഥ 7. വിവര്‍ത്തനം/പുനരാഖ്യാനം 8. ചിത്രീകരണം 9. ചിത്രപുസ്തകം 10. പുസ്തക ഡിസൈന്‍/പ്രൊഡക്ഷന്‍ എന്നീ വിഭാഗങ്ങളിലെ മികച്ച ഗ്രന്ഥങ്ങള്‍ക്കാണ് പുരസ്കാരങ്ങള്‍. പ്രശസ്തിപത്രവും ശില്പവും 20000രൂപയും അടങ്ങുന്നതാണ് ഓരോ പുരസ്കാരവും. പ്രാദേശികഭാഷയിലുള്ള ബാലസാഹിത്യത്തിന് ഇത്രയധികം അവാര്‍ഡുകള്‍ നല്‍കുന്ന മറ്റൊരു സ്ഥാപനവും ഇന്ന് ഇന്ത്യയിലില്ല. ലോകത്തു തന്നെ അപൂര്‍വ്വമായ ഈ പുരസ്കാരങ്ങള്‍ ഏറെ അഭിമാനത്തോടെയാണ് ഇന്‍സ്റ്റിറ്റ്യൂട്ട് സമ്മാനിക്കുന്നത്.