കുട്ടികളാണ് രാജ്യത്തിന്റെ ഭാവി – മന്ത്രി സജി ചെറിയാൻ
2023ലെ ബാലസാഹിത്യ പുരസ്കാരങ്ങൾ സമ്മാനിച്ചു

കുട്ടികളാണ് രാജ്യത്തിന്റെ ഭാവി എന്ന് സാംസ്കാരികവകുപ്പുമന്ത്രി സജി ചെറിയാൻ. കേരള സംസ്ഥാന ബാലസാഹിത്യ ഇൻസ്റ്റിറ്റ്യൂട്ട് പ്രഖ്യാപിച്ച സംസ്ഥാന ബാലസാഹിത്യ പുരസ്കാരങ്ങൾ ജേതാക്കൾക്കു സമ്മാനിച്ച് സംസാരിക്കുകയായിരുന്നു അദ്ദേഹം. മതത്തിന്റെയും ജാതിയുടെയും അന്ധവിശ്വാസങ്ങളുടെയും ആശയങ്ങൾ കുട്ടികളിലൂടെ നടപ്പിലാക്കുവാനുള്ള ശ്രമങ്ങളെ പ്രതിരോധിച്ച് ശാസ്ത്രം, യുക്തി, പുരോഗമനാശയങ്ങൾ എന്നീ ആശയങ്ങൾ കുട്ടികളിലേക്കെത്തിക്കാൻ ശ്രമിക്കണം. അദ്ദേഹം കൂട്ടിച്ചേർത്തു. ഇൻസ്റ്റിറ്റ്യൂട്ടിന്റെ 2023ലെ പുരസ്കാരങ്ങളാണ് മന്ത്രി സമ്മാനിച്ചത്.

സമഗ്രസംഭാവനപുരസ്കാരം ഉല്ലല ബാബു ഏറ്റുവാങ്ങി. കെ വി മോഹൻകുമാർ(കഥ), ദിവാകരൻ വിഷ്ണുമംഗലം(കവിത), ശ്രീകൃഷ്ണപുരം കൃഷ്ണൻകുട്ടി(വിവർത്തനം/പുനരാഖ്യാനം), ഡോ. ടി ഗീനാകുമാരി(വൈജ്ഞാനികം), ശ്രീചിത്രൻ എം ജെ(വൈജ്ഞാനികം), സാഗാ ജെയിംസ്(ശാസ്ത്രം), സെബാസ്റ്റ്യൻ പള്ളിത്തോട്(ജീവചരിത്രം), സാബു കോട്ടുക്കൽ(നാടകം), ബോബി എം പ്രഭ(ചിത്രീകരണം), പൂർണ്ണ പബ്ലിക്കേഷനുവേണ്ടി കെ ശ്രീകുമാർ(പ്രൊഡക്‌ഷൻ) എന്നവർ മറ്റു പുരസ്കാരങ്ങളും ഏറ്റുവാങ്ങി സംസാരിച്ചു.
2024 ജനുവരി 17ന് തിരുവനന്തപുരം പ്രസ്സ്ക്ലബിൽ നടന്ന ചടങ്ങിൽ ബാലസാഹിത്യ ഇൻസ്റ്റിറ്റ്യൂട്ട് ഡയറക്ടർ പള്ളിയറ ശ്രീധരൻ അധ്യക്ഷത വഹിച്ചു. സാംസ്കാരികവകുപ്പു ഡയറക്ടർ എൻ മായ ഐ എഫ് എസ് , ഭാഷാ ഇൻസ്റ്റിറ്റ്യൂട്ട് ഡയറക്ടർ ഡോ. സത്യൻ എം, ബാലസാഹിത്യ ഇൻസ്റ്റിറ്റ്യൂട്ട് ഭരണസമിതി അംഗം സുജ സൂസൻ ജോർജ്ജ്, എം ജി. കോളെജ് അസിസ്റ്റന്റ് പ്രൊഫസർ എൻ കെ സുനിൽകുമാർ, ബാലസാഹിത്യ ഇൻസ്റ്റിറ്റ്യൂട്ട് അഡ്മിനിസ്ട്രേറ്റീവ് ഓഫീസർ ബിനോദ് കെ എന്നിവരും പുരസ്കാരജേതാക്കളും സംസാരിച്ചു.